لكل القمرات اللى عايزين يعرفوا طريقة عمل لكلوك الأطفال ده شرح لأسهل وابسط طرق عمل الاحذية . ومع الشرح صور للغرز ورمزها فى الباترون
طريقة أخذ مقاس الحذاء الطول والعرض وعلى الجانب المقاس المفضل لك سن
القاعدة البيضاوية وهي اساسية عند شغل اى لكلوك
- اشتغلنا 12 سلسلة وهنزود عليها 3 سلاسل ارتفاع لانى هكمل بغرزة العامود .
ملاحظة 1** انت ممكن تشتغلى اكتر من 12 س او اقل حسب المقاس اللى هتعملى الحذاء له المهم لا تنسي سلاسل الارتفاع *
ملاحظة 2*** سلاسل الارتفاع عددها بيعتمد على الغرزة اللى هتكملي بها زي ما شرحنا فى الدورة قبل كده يعنى لو هكملالقاعدة بغرزة الحشو هاشتغل 1 س ارتفاع بعد ال 12 س الاساسية ولو هاشتغل نصف عامود هاعمل 2 س ارتفاع وهكذا **
2- هنفوت اول 3 س (وهم سلاسل الارتفاع ) بدون شغل هنتركهم فاضين النقطة الصفراء لتوضيح الغرزة اللى هنشتغل فيها
3- وداخل السلسلة 4 هنشتغل 2 عامود (غرزة تزايد ).
4- بداية من السلسلة رقم 5 هنشتغل عامود واحد فى كل غرزة لحد ما نوصل لأول س اشتغلناها .
5- فى اول س اشتغلناها هنعمل 5 عامود مع بعض (تزايد)
6- الف القطعة واكمل شغلى عامود فى كل عامود
7- فى اخر غرزة اشتغل 3 عامود واقفل السطر بغرزة منزلقة
اكمل للسطر الثاني ب 3 س ارتفاع
داخل نفس الغرزة اللى عملت فيها سلاسل الرتفاع هاشتغل 2 عامود
* ملاحظة ** هنا بنحسب سلاسل الارتفاع على انهم عامود فيكون المجموع للاعمدة فى الغرزة 3 اعمدة 1 سلاسل الرتفاع + 2 عامود .
فى الغرزة التالية هاشتغل 2 عامود كمان (تزايد ) وبعدين هاكمل عامود فى كل عامود لحد ما اوصل للخمس غرز التزايد اللى فى السطر السابق
غرز التزايد الخمسة هاشتغل فيها كما يلي : غرزتين فى اول عامود ، غرزتين فى ثاني عامود ، 3 غرز فى ثالث عامود ، غرزتين فى رابع عامود ، غرزتين فى خامس عامود أصبح مجموع غرز الزيادة فقط 11 عامود
بعد كده هاكمل عامود واحد فى كل عامود
فى الغرزة قبل الأخيرة اشتغل 2 عامود زى ما موضح على الصورة.
ملاحظة ** الغرزة الأخيرة هنا هى المنزلقة وبتركها بدون شغل
نقفل السطر بمنزلقة فى ثالث س من سلاسل الارتفاع ونطلع 3 س ارتفاع . اصبح واضح الان ان الجهة الاغرض هى مكان الاصابع ومقدمة الحذاء
السطر الثالث هاشتغل عادى عامود فى كل عامود لحد ما اوصل لأول عامود فى غرز الزيادة وأبدأ اشتغل كالتالى :: 2 عامود فى اول غرزة ، 1 عامود فى الغرزة التالية ، 2 عامود فى الثالثة ، 1 عامود فى الرابعة ، وأكمل بنفس النمط لحد ما انتهى من ال 11 غرزة اللى هم غرز الزيادة من السطر السابق
توضيح لنمط الزيادة عند مقدمة القدم فى السطر الثالث
السطر الرابع : هاشتغل عامود بكل عامود بدون اى غرز زيادة .
السطر الخامس اطلع 3 س ارتفاع واثني الحذا نصفين عشان احدد المنتصف بالظبط واحط علامة عند غرزة المنتصف وهيتم توضيحها فى الصور
اشتغل اعمدة عادي واقف قبل المنتصف اللى تم تحديده ب 7 غرز
فى الغرزة السابعة قبل المنتصف هابدأ اشتغل غرز التناقص كالتالي
فى اول غرزة من السبع غرز هاشتغل تناقص فى عامودين وفى تاني وثالث غرزة كمان هاشتغل تناقص بعامودين يبقى انا كده اشتغلت فى 6 غرز ونقصتهم ل 3 غرز .
الغرزة السابعة هاشتغل تناقص ب 3 اعمدة . وبعدين ارجع اشتغل تناقص بعامودين فى ال 6 غرز التالية
رسمة توضح طريقة ونمط التنقيص
اكمل السطر بأعمدة عادية بعد ما انتهى من التناقص واقفل السطر بمنزلقة
السطر الأخير امكمل بنفس طريقة السطر السابق لكن هاقلل غرز التناقص
هنا اشتغلنا غرزتين تناقص فى 4 اعمدة غرزة فى كل عامودين
وبعدين غرزة تناقص فى ال 3 اعمدة التالية وبعدين غرزة تناقص فى عامودين ثم تناقص فى عامودين واكمل السطر بأعمدة للنهاية
بكده يكون الحذاء تم الانتهاء منه
لتقفيل والشكل النهائي يرجع لكل واحدة وذوقها وهل الحذاء لولد ام فتاة ممكن استخدم شرائط ستان او ورد او رسومات اطفال واخيطها او الصقها كيفما شئت . ارجوا ان الشرح يكون واضح ووافي
ليست هناك تعليقات:
إرسال تعليق